Səhərin gözü açılmamış
Başlayır ayaq səsləri.
Natamam səkilər
Palçığa bulayır ayaqqabıları.
Külək saçları dağıdır
Toz basır ipək tellərin arasını.
Göyərçinlər günəşi gözləyir,
Sahildə ancaq pişiklər gəzir,
İnsanlar natamam səkilərdə.
Gözlər köhnə sevgiləri axtarmır,
Yolun naxışlarını izləyir,
Ayaqqabı iplərinə ilişir nəzərlər.
Siqaret tüstüsü burunları sınağa çəkir,
Ağızlarda gecədən qalan acı dad.
Ah, gün bitsəydi yenə,
Ah, heç başlamamış olan bu gün.
Kaş yenə yorğun günün
Yarımçıq yuxusuna çataydıq,
Və sonra yenə açılaydı gözlərimiz
Səhərin gözü açılmamış.