Mən səni saçlarının küləyindən bilərəm,
Mən səni baxışının gileyindən bilərəm,
Mən səni büllur kimi ürəyindən bilərəm,
Sən məni ürəyimin yorğunluğundan tanı.
Ayrı düşmərik daha, getmərəm də bu yerdən,
Əllərimin zənciri möhkəm olur dəmirdən,
Yadların arasında itirsən məni birdən
Hamı xürrəm olanda durğunluğumdan tanı.
Bəşər gözümdən düşür səndən uzaq qalanda,
Özümü unuduram səni yada salanda.
Əllərində tərəddüd, üzündə qəm olanda
Susmayan kədərimin dolğunluğundan tanı.
Bir zaman gəlib məni gözümdən tanımasan,
Yollarına yapışan izimdən tanımasan,
Məni bilən qəlbinin səsindən tanımasan
Ağaran bənizimin solğunluğundan tanı...
17.08.2022
