qələmi unutmuş əllər
mürəkkəbi ləkə sanır
köynəyinin qollarında,
dəftəri cib dəsmalı.
saçına sığal,
qulağına musiqi toxunmursa,
gözlər üfüqə,
dodaqlar təbəssümə həsrətdirsə,
fikirləri nə böyük,
istəkləri nə böyük -
baş - gövdə üstündə yük.
susmaq nə ucuzdur,
danışmaq nə dəyərsiz.
incə ipin üstündə
nə çətindir yerimək.
tərəzinin qollarından
kimlər sallanır, kimlər?
üç gün susuz
bir ay yeməksiz dözməyən insan
necə dözür illərlə
şeirsizliyə,
sevgisizliyə,
ədalətsizliyə?