Çox islandım bu leysanda, suyum durmaz, lilim dönməz.
Güman etməz duyan vardır, ürək çağlar, dilim dönməz.
Gör ömrüm keçdi tam təndən, fəqət zehnim cavan qaldı,
Qərib hal bir zamandır ki, günüm bitməz, ilim dönməz.
Nə məndən bir Musa çıxmaz, nə firondan qaçar qövmüm,
Əsamın yoxdu bir sehri, qoşun yetsin, Nilim dönməz.
Nə qismətdir, xəyalımdan uzaq düşmüş mənim bəxtim,
Alından min qırış keçsin, minin birdən silim, dönməz.
Müzəffər, qeyb olub şövqün, həkimlərdən dəva axtar,
Fəqət yoxdursa bir dərman, xəbərdar et, bilim dönməz.
