Bilmədim

Suyum elə qurudu ki

Torpağa hopa bilmədim.

Mənim yerim haradı ki?

Axtardım, tapa bilmədim.

​Çörək tapmağa çalışdım,

Bir ovuc unla qarışdım,

Təndirdə özüm alışdım,

Kömbəmi yapa bilmədim.

​Pay düşmədi gözəlindən

Yolum daşdı əzəlindən,

Yorğa atların belindən

Yıxıldım, çapa bilmədim.

​Dostlarımdan ayrı düşdüm,

Düşmənimlə dərd bölüşdüm,

Mən ki əliboş döyüşdüm,

Tutdular topa, bilmədim.

​Ürəyim də yarıtmadı,

Yoruldu, gücü çatmadı,

Ha lay-lay dedim yatmadı

Heç ipə-sapa, bilmədim.