Üzsüz gəmiçi

Çağlayan dənizdi zehnimin içi

Alnıma zərbələr vurur dalğalar,

Gözümdən tökülür duzlu suları.

Mənimlə dalaşır üzsüz gəmiçi,

Çiyninə oturub qara qarğalar,

Solundan sağına düzmüş sıralı. 

Dilimdən bir-iki kəlmə söz çıxır,

Bilmirəm şirindi, acıdı, şordu.

Üzümə gözümün içindən baxır,

Üzsüz gəmiçinin gözü də kordu.

Mənim gözlərimdən baxır cahana,

Mənim qulağımla duyur aləmi,

Mənim əllərimə möhtacdır, fəqət.

Mənimlə döyüşür yıxan-yıxana.

Mən onu öldürsəm deyərlər dəli,

O məni öldürsə öz canına qəsd.