zənn edir

baxışın olsa da mənə hədiyyə,

çox baxma işığı itməsin deyə.

gözəl gözlərinin güzgüsü niyə

məni olduğumdan böyük zənn edir?

həsrətin örtdüyü yandandı bəlkə,

arada dayanan yoldandı bəlkə.

yarısı səndədi, bundandı bəlkə,

görənlər qəlbimi bölük zənn edir.

palçığa batanda bəlkə görünmür,

fəqət nə olsa da işığı sönmür.

həqiqət dalınca keçməyən ömür

günəşi gecələr sönük zənn edir.

sən də bilirsən ki, həsrətlər əbəs,

qəlblər arasına məsafə girməz.

yalnızca ürəyi daşdan olan kəs

insanı bir qucaq sümük zənn edir.