Dəyişib..

Hələ də özümdən utanıram mən
Səni unutmağa necə qıymışam..
Ara bir özümə deyirəm, görən
Neçə ilimizi yarım qoymuşam?

Bilirsən, bəlkə də, günah səndədi,
Saçların dəyişib, üzün başqadı..
Gəzdiyimiz küçə öz yerindədi
Amma o küçənin dəyişib adı..

İndi bütün şəhər dəyişsə belə,
Görüş yerimizin yolu eynidi.
O yerdən sağ çıxan olmayıb hələ,
Bütün sevgilərin sonu eynidi..